එතෙර මෙතෙර ජයගන්න උත්සාහ දරන නෙතූගේ සිහින අල්ලන ව්‍යාපාර 

අපේ රටේ සමාජ මාධ්‍ය වේදිකාවන් භාවිත කරමින් නැගී සිටින අංකුර ව්‍යවසායකයන් පිළිබඳ කතා අප ඉඳහිට ඔබ හමුවේ තබනවා. ඉතින් අද අපි ඔබ හමුවට කැඳවන්නෙ එවන් තරුණ ව්‍යවසායිකාවක්. ඇය නමින් නෙතුමිණී තල්ලාවල. දිරියෙන් නැගී සිටින තරුණියක්.

නෙතුමිණී සමාජ මාධ්‍ය වේදිකා තුළ විසිතුරු සැරසිලි අයිතම නිර්මාණය කර අලෙවි කරනවා. Nethu’s Dreams තමා ඇගේ ප්‍රධානතම සන්නාමය. ලොව පුරා අතිශය ජනප්‍රිය සැරසිලි අයිතමයක් වන "ඩ්‍රීම් කැචර්ස්" තමා නෙතූස් ඩ්‍රීම් සන්නාමය යටතේ ඇය නිර්මාණය කරන්නෙ. ඊට අමතරව Dreams Line, Dreams Dora වගේ සන්නාම යටතේ තවත් අයිතම නෙතූ නිර්මාණය කරනවා. මේ හරහා දේශීය වගේම විදේශීය වෙළෙඳපොළ වෙත යන්නත් මේ වන විට ඇය සමත්.

නෙතූගේ ආරම්භය පිළිබඳ කතාව තරමක අපූරු කතාවක්.

“වයස අවුරුදු 21 දී, ඒ කියන්නෙ 2019 දී තමා මම මේ ව්‍යාපාරය පටන් ගත්තේ. උසස් පෙළට වාණිජ විෂය ධාරාව හදාරලා නැගෙනහිර විශ්වවිද්‍යාලයට සුදුසුකම් ලැබුවත්, HNDA පාඨමාලාව හදාරන්න මම තීරණය කළා. මේ කාලේ "ඩ්‍රීම් කැචර්ස්" වලට මට ආසාවක් ඇතිවුණා. ඒත් මිලදී ගන්න ගියාම ඒවා ටිකක් මිලෙන් වැඩියි. ඒ නිසා මම හිතුවා මේක මට හදන්න පුළුවන් කියල. ඒත් මම ක්‍රමය දැනගෙන හිටියෙ නැහැ."

YouTube වීඩියෝවක් බලලා තමා නෙතුමිණී අවශ්‍ය දැනුම එකතු කරගත්තේ. මේ නිර්මාණය සඳහා අවශ්‍ය පිහාටු ආදී කළමනා වෙළෙඳසලකට ගිහිල්ලා මිලදී අරගත්තා. ඒත් සමහර දේවල් හොයාගන්න බැරිවුණා. තාත්තා තමා ඒ වෙලාවේ උදව්වට ආවේ. තාත්තා ඩ්‍රීම් කැචර් එක සඳහා අවශ්‍ය වළල්ල අතින් නිර්මාණය කරලා දුන්නා.

ඉතින් තමන්ගෙ පළවෙනි ඩ්‍රීම් කැචර් එක නෙතුමිණී නිර්මාණය කළා. නිර්මාණය නිමාවේදී හැමෝගෙන්ම ලැබුණේ ඉතාම හොඳ ප්‍රතිචාර.

“ගෙදර අය, යාළුවෝ ඒක ලස්සනයි කියලා කිව්වා. එතකොට මට හිතුණා මෙතැන ව්‍යාපාර අවස්ථාවක් තියෙනවා කියලා. Facebook Page එකක් හරහා තමා මම මේක පටන් ගත්තේ. අයියා කෙනෙක්ට කියලා තමා ඒ Page එක හදාගත්තේ. මේ විදිහට 2019 අප්‍රේල් මාසේ Facebook සහ Instegram හරහා මම මේ ව්‍යාපාරය පටන් ගත්තා."

Dream catchers කියන්නෙ රතු ඉන්දියානු සංස්කෘතික විශ්වාස මත නිර්මාණය වුණු අපූරු සැරසිල්ලක්. නපුරු සිහින අල්ලලා සිරකිරීම වෙනුවෙන් තමා ඒ කාලේ රතු ඉන්දියානුවෝ මේ නිර්මාණය සිදු කළේ. පසුකාලීනව Dream Catchers ගෝලීය වශයෙන් ජනප්‍රිය සැරසිල්ලක් වුණා. මේ සම්බන්ධව ඉහළ වෙළෙඳපොළක් නිර්මාණය වුණා.

“ටික කාලයක් යනකොට Facebook Page එක ජනප්‍රිය වුණා. ලංකාවේ සැලකිය යුතු පාරිභෝගික පිරිසක් නිර්මාණය වුණා. ඒ අතරේ පේජ් එකට පිටරටවල අයත් මැසේජ් කළා. ඉන්දියාව වගේ රටවලින් ලැබුණු ඇණවුම් භාරගත්තා. ඊටපස්සේ E Bay හරහා Dreams Catchers අලෙවි කරන්නත් මම පටන් ගත්තා."

2022 පමණ වෙනකොට ඇමෙරිකාව, කැනඩාව වගේ රටවලටත් ලංකාවේ හදපු Dreams Catchers යවන්න නෙතූ සමත් වෙනවා. ඒක සැබෑ ජයග්‍රහණයක්. ඇගේ උනන්දුවත්, කුසලතාවත්, දැනුමත් මේ ජයග්‍රහණය පිටුපස තිබුණු බව බොහොම පැහැදිලියි.

“මුල් කාලේ මේ වගේ කුඩා ව්‍යපාර කරන අය එතරම් හිටියේ නැහැ. ඒත් පිරිස ක්‍රමයෙන් වැඩි වුණා. මම ඒ අභියෝගය භාරගත්තා."

තනිව නිර්මාණය අපහසු වූ තැන තම සහායට එක් අයෙක් සේවයට එකතු කර ගන්නත් මේ කාලේදීම නෙතුමිණී කටයුතු කරල තියෙනවා.

“නුවර බෝගම්බර මම මුලින්ම ප්‍රදර්ශනයක් කළා 2021 දී. එතැනදී මට තවත් පාරිභෝගිකයෝ පිරිසක් හම්බවුණා. ඊටපස්සේ KCC එක විසින් පවත්වන Exhibition එකේ අවුරුදු දෙකකදීම මම ස්ටොල් දැම්මා. පහුගිය අප්‍රේල්වල මහනුවර සහස් උයනෙත් වැඩකටත් සම්බන්ධ වුණා."

පසුගිය වසංගත සමයේ සෑම ව්‍යාපාරයකටම මුහුණ දීමට සිදුවූ අර්බුදවලට නෙතුමිණී තල්ලාවල ගොඩනැගූ ව්‍යාපාරයට ද මුහුණ දීමට සිද්ධ වුණා. විදේශ ඇණවුම් නොලැබී යෑම වගේම දේශීය වශයෙන් පැවති ඉල්ලුමත් සැලකිය යුතු ලෙස පහළ ගියා.
“විදේශ ඇණවුම් ලබාගැනීම ගැටලුවක් වුණා. මේ වන විට තාවකාලිකව E Bay නතර කරලා තියෙන්නෙ. පාර්සල් ගනුදෙනු නැව්ගත කිරීම් පිළිබඳ මම අධ්‍යයනයක් කරනවා. ඒ නීති ගොඩක් වෙනස්වෙලා. හරියට දැනගෙන ලාභදායී විදියට පටන් ගන්න ඕනෑ."

කොහොම නමුත් අර්බුදය පාඩම් ඉගෙන ගැනීමට මෙන්ම, නව අවස්ථා උදාකර ගැනීමට ද නෙතුමිණි භාවිත කළා.

“මම හිතුවා Dreams Catchers විතරක්ම කරලා හරියන්නෙ නැහැ කියලා. මම අලුත් දෙයක් ගැන කල්පනා කළා. මේ අතර HNDA වල තුන්වැනි වසරේ ඉන්නකොට මට ඩෙංගු හැදුණා. එතකොට මම සීමාවාසික පුහුණුවක හිටියේ එක්තරා ආයතනයක. විවේකීව ඉන්න කියලා වෛද්‍ය උපදෙස් ලැබුණා. ඉතින් ගෙදර ඇවිල්ලා ඉන්නකොට බෑග් ඩිසයින් කරලා අලෙවි කරන්න ඕනෑ කියල මට අදහසක් ආවා."

මේ වන විට Dreams Line සන්නාමය යටතේ සමාජ මාධ්‍ය වෙළෙඳපොළ තුළ විවිධ බෑග් වර්ග අලෙවිය සිදුවෙන්නේ ඇගේ මේ අදහස අනුව.

“2023 දී මම පටන් ගත්තා Gift Box ව්‍යාපාරයක්. මට ඕනෑ මේ වගේ දේවල් රුසක් එක්ක Brands කිහිපයක් තියෙන Group එකක් විදිහට මගේ ව්‍යාපාරය ඉදිරියට අරගෙන යන්න."

සමාජ මාධ්‍ය වේදිකාවල් භාවිත කරමින් නැගී සිටින්නට උත්සාහ කරන ව්‍යවසායිකාවක් විදිහට විවිධ දැනුවත් කිරීම වැඩසටහන් සමඟින් සම්බන්ධ වෙන්න නෙතුමිණී තල්ලාවලට අවස්ථාවක් ලැබුණා. ඇය කොළඹ විශ්වවිද්‍යාලය සහ නැගෙනහිර විශ්වවිද්‍යාලය සංවිධානය කළ සම්මන්ත්‍රණ වගේම මාර්ගගත සාකච්ඡාවලට සම්බන්ධවෙලා තියෙනවා.

නෙතුමිණී නූතන සමාජ මාධ්‍ය කුඩා ව්‍යාපාර රුල්ලේ ආරම්භය නියෝජනය කරන කෙනෙක්. නූතනත්වය සමඟ මුසුවී ඉදිරියට එන්න උත්සාහ දරන මෙවන් තරුණ ව්‍යවසායිකාවන්  සමස්ත සමාජයටම ආදර්ශයක් සපයනවා. අවසානයේ අපි සඳහන් කරන්න ඕනෑ බලධාරීනුත් මෙවන් ව්‍යාපාර සඳහා අනුග්‍රහය දැක්වීම රටේ දියුණුවට අත්‍යවශ්‍ය දෙයක් කියන කාරණය.